沙湾---粤音悠扬

“沙湾何，有仔唔使忧老婆”，呢句说话道出咗沙湾自古以来嘅繁荣富庶。北江，西江系度交汇，肥沃沙田数万顷，人哋食不果腹嘅时候，佢哋就饱暖无忧嘅啦。沙湾何氏系广府巨族，佢哋坐船往返广州，挂出何府嘅灯笼，人哋睇住个“何”字，仲要礼让三分添！哇，咁威水嘅，系啦，仲有广东偈后语话：沙湾灯笼——何苦（何府），就系咁嚟嘅啦。

自南宋以来，沙湾出咗二几位进士，佢哋觉得做官唔好玩，番咗沙湾，冇嘢就搵嘢嚟搅，玩音乐、玩飘色、玩建筑艺术……深厚嘅文化底蕴一路传承落来，广东音乐之乡、广东民音艺术之乡系当之无愧嘅。

为咗一曲广东音乐《雨打芭蕉》同埋一杯正宗嘅撞姜奶，我哋寻声寻味嚟到沙湾，去感受果个岭南文化古镇嘅魅力。

青砖、镬耳、砖雕、灰塑、壁画，行走其间，好宁静，好有古色古色嘅味道。

行走间，睇到一个好盏鬼嘅街巷，鸡“未成肉”巷，呢个字广东话读春（chun），鸡未长成肉，咪就系鸡蛋啰，原来呢条街巷以前系卖鸡蛋嘅。

行走间，睇到三稔厅，呢度就系广东音乐嘅祖庭啦，何氏三杰系度创作出好多经典嘅广东音，我最中意就系《雨打芭蕉》啦。芭蕉，系文人眼中嘅多愁善感之物，吴梦窗话：何处合成愁，离人心上秋，纵芭蕉，不雨也飕飕！岭南初夏嘅午后，庭院深深，雨打芭蕉，淅淅沥沥，好欢快咁，不过呢独自倚窗听雨嘅人，系点样一种心绪就唔知啦。

大日头，鬼咁晒！我哋嚟到沙湾奶牛皇后避暑，饮咗一杯最正宗嘅姜撞奶，唔错嘅，好滑好嫩！好好饮嘅！

大日头，晒到摞命！走马观花咁行咗几步，冇心情系度继续玩，我哋走啦。不过，下次有时间仲要返嚟呢度，睇飘色，睇留耕堂。

行番虎门轮渡，又上咗66—13呢部渡轮，记得几年来往返南番顺搭乘最多嘅就系呢部66—13啦，咁咪系话我碌碌一生啰，66-13，唉！