2011.1.29～2.10·印尼·巴厘岛、龙目岛、日惹12日游记

foxchildren · 2011-03-16 15:45

1月31号 ZEN Spa、女神庙、海神庙、蓝点

早上八点半起床，执好野九点三吃早餐，有十款可以选，我地选左Omelet，茶同果汁，的确几好吃，火蝎同学既推荐果然冇错。同酒店仲有1家貌似新加坡人系度渡假。吃完影左一阵相九点九出门口去ZEN。

10点就行到去了，Renee选左lulu我就系传统massage，都系15万，lulu系1个钟头9个字，传统系1个半钟。房间环境干净，其中一面墙系直接通出去外面庭院既，比较有格调但系唔算高级。传统Massage按摩手势对得住个价钱不过冇惊喜；lulu就好抵，酸奶身体按摩、花瓣浴一应俱全，Renee话好正想做多次。service 佢既系一个后生女，都几好倾，我就系一个中年大妈，比较少沟通了。系房间里面既Manu见到有全日Spa套餐，由早上9点pick up到下午4点结束，价格系60万，包2次Spa、早餐中餐、修甲等等，如果有大把时间系Ubud hea既话可以考虑下。做完11点9，仲有一碟水果同姜茶提供，唔错。我地本来打算比tips，但系都冇机会比，staff又冇主动要，我地就算了。

做完spa行过对面马路，就有一间系稻田旁边既餐厅，叫左猪排同炒饭，对住个稻田，好好feel，猪扒好好味，烧得好好，同后来吃过既扒类对比，本次所吃到既扒系全行程最好吃既，诚意推荐，6万5含税。12点半吃完，11万含tips，好好味，好过昨晚果餐。

之后行翻酒店，路上以1比9000换左3百美金，后面有一间9015，亏了。再去买左Mentari品牌既Sim卡，购卡费2万，内含3千话费，再充左2万5，每次充值手续费都要2千，合计4万7。

然后一路狂冲翻酒店，1点两翻到酒店check out，司机一早就到左了。系印尼司机都会提早到既，我地未遇到过一个迟到既司机，相当好。

退房后1点半出发，由于我地时间唔够，Ubud皇宫、市场及周边及工艺品村都冇办法去到，综合考虑之后，我地选择既系女神庙一线，非金塔马尼火山一线。事实证明，去金塔马尼火山会好D，因为女神庙一线基本上都系庙，冇咩特别。一上车司机就话去我地既行程可能唔够时间去海神庙，我地话睇时间再决定。

一路上都系乡村风情，司机选左一条小路可以停车，我地好free甘影左一阵稻田同梯田，岩好系早造米收成，二造米播种，有对比。当地由于稻田面积唔大且丘陵地带多，所以机械化程度比较低，都系人手播耕收。梯田规模暂时见到既就比较小，可能依家系广东都稳到比佢大既。以后我地一路向女神庙前进，但系好快就开始落雨，真系顶！

大概2点4，去到Pacung，就系对住梯田饮茶果度。我地落车既地方系一间酒店，我地冒雨进入酒店内部，从观景台果度望出去，下面应该系好大既一个山谷以及梯田，但系落雨之后光线唔好烟雨迷蒙，唔系好真确。我地影左几张相之后继续出发。

3点去到一个比较大既蔬果市场，由于好大雨我地行得好辛苦，最后买左两盒草莓，2万一盒，一个火龙果1万，合计5万，感觉水果价钱都唔算平，同时市场巨多一袋袋炸好既虾片出卖，几乎同水果一样多，同时都见当地人去，虽然唔多。

离开市场之后3点3就去到女神庙了，门票1万1张，入去行左9个字左右，其中一间殿整紧，成个庙就修葺紧。湖水满到岸边，岸边果间主殿去唔到。园区内有一个台湾旅行团一齐参观，我地就乘机听左一下讲解，不过冇咩特别。

搞掂女神庙之后我地4点出发，上车果时Wayan请我地吃粟米，都几好人。落山途中问Wayan，点解唔见草莓小站，Wayan话草莓小站就系水果市场内。但系我地系市场内完全唔觉有类似既地方，唔知系功课冇做好定Wayan水我地了，总之晒左。

4点4去到皇家寺庙，中间经过一个丛林中既coffee shop，Wayan推荐我地去，有4个华人岩岩出黎。基于我地对Coffee完全冇兴趣，而且时间比较紧了，我地冇入去而继续前进。

5分钟后就到寺庙了，门票3千1人。园区一般般，都算大，不过就比较简单，行左半个钟就走了。跟住同Wayan倾左好耐，终于倾好去海神庙，佢话要1个钟，结果半个钟就到了，真系唔老实。

5点3去到海神庙，门票2万，停车费5千。入内马上就系好大条购物街，系我第一次系景区见到甘具规模既购物街。街内买野讲价要按3折既比例，唔得就走。穿过晒购物街就到海边，总共有4个突出海边既地方可以去，其中一个系悬崖餐厅，可惜日落睇唔到，所以唔值得吃晚饭。系海神庙旁边既海边比较大浪，我地比其中一个冲湿晒，连兔仔仔同相机不幸中招，相机个LCD搞到有个虹，惨～～～～～。我地系购物街买左40个钥匙扣6万，两对猫仔3万，1只龟万5，唔知乌布果边咩价钱，但系比我地后来去既巴厘岛其他地方都平。由于冇日落，我地6点8离开，出发去蓝点。

7点去到库塔市区，见到家乐福同EF，然后陷入塞车！Wayan话起码要1个钟先到酒店，我同Renee商量左一下，基于今日既路程同塞车，比45美金租车啦，毕竟Wayan住Ubud，系蓝点9点走都要成11点先到屋企，比较辛苦，不过呢个就系底线了。塞左10个字终于过左，原来系因为水浸！睇黎巴厘岛既排水系统要多多改善了。

9点几终于到左蓝点，离外面比较远，由大路入去蓝点既分岔路路况比较差，由于冇甘多美金碎纸，所以比左40万包车费，亏啊！办入住，被告知无大床房了，一番沟通之后由318改成515。入到去，房间好大，但系比较旧，感觉唔算好干净。有一盘好残既水果，同埋1支大水2支细水。阳台好大，有台有凳，但系好大尘。之后上网，网速机慢！仲差过casa！就从房间黎讲，真系唔值100刀一晚！

冲完凉，洗左草莓，比较邋遢，洗左好耐，吃落唔甜，另外一个火龙果就比较老身，同埋味道同广州有D唔同，甜同臭青均有。一路吃一路睇Flash Forward，睇左一阵就训了，今日比较攰了。

foxchildren · 2011-03-17 04:30

2月1号 Blue Point、金巴兰

1号

我地今日主要系Hea，所以早上九点起床，九点半去吃早餐，点左一个印尼炒饭＋一个印尼炒面，两杯芒果汁＋茶。完全系午饭既分量！味道好好！餐厅对住大海，好好feel！下面个海好大浪，有人玩冲浪，好型！

吃完早餐11点开始行下酒店，岩好有人拍婚纱相，貌似系东北佬！效果真系几好！

行左一轮，我地系泳池边影左好多相，到12点左右开始三国杀，估计系Blue Point历史上第一场杀了。期间有4个中国女仔经过见到我地杀，惊奇状！另外又遇到1家3口广州人。BTW，三国杀Renee全胜！

大概2点果时叫左一份3文治同一份鸡肉汉堡，1支可乐，合计14万5百，冇比tips，分量一样非常足！一直杀到3点，见太阳冇甘晒了我地开始落水，泳池好深！但系水质好好，完全冇漂白粉消毒剂既味道，非常好既景致！

游到4点3，Renee完全未够喉，我就同广州一家人约好5点钟拼车去金巴兰吃海鲜，包车15万来回。之后我地就起水梳洗了，就甘Hea左一个下午。

5点钟准时出发，结果又系5点钟开始落雨，搞到日落又冇得睇，又唔可以系沙滩上吃饭，最紧要系冇办法自己系海滩上稳下餐厅。系部车司机带领下，去左一间最靠近海边既餐厅吃，广州一家人要左90万既套餐，我地就要70万套餐，有1条龙虾、1条鱼、6只虾、6只贝、1碟通菜、两杯果汁，2碗汤、一人半个薯仔，加上15％税，再打9折，最后72万4千！海鲜都系烧烤，味道对唔起个价钱，不过烧烤酱既味道比较特别，总既黎讲就系贵。吃既过程中都有几个中国人过黎睇下餐牌，我地顺便做左下导游，介绍左一下。

由于天气问题，都系睇唔到日落，最后吃到7点3，出海滩行左一轮，海滩系黄色既沙，唔干净，8点出发翻蓝点。

翻到酒店8点半，洗左衫，睇左两集Flash Forward，同今日包车佬约好听日佢安排司机包我地去库塔同Nusa Dua，之后就训觉了。

foxchildren · 2011-04-10 10:41

终于等到可以再上传相了～～～～～～～继续～～～～～～～

2号

早上8点起床，吃左美式早餐，仲饱！

吃完早餐，我地就从蓝点正门旁边既小路落去海滩，沿路有饭店，房出租，同埋滑浪用品，价钱应该比较低，据广州一家人讲寻日中午佢地1家3口先吃左几万。石级唔系甘好落，比较烂，落到最底就系直通海滩了，但系涨潮，出唔到外面，晒左！系我地落黎既过程中，见到好多鬼佬同日本仔就甘罗住个冲浪板就游出去，实在太型了！影左一轮相之后，我地大概11点翻上蓝点，再行左一阵酒店，望左阵无边泳池同玻璃教堂，将呢个甘奇妙既地方印记入脑海。

离开泳池我地就翻房执野，衫基本都干了，由于拖鞋质量好及舒服程度相当高，我地决定将两对拖鞋作为souvenir。执好野11点9退房，司机已经到左了，系寻日个司机个表弟，睇起身都唔知够枰未，不过就好有礼貌。我地同佢讲好行程之后就出发了。

首先我地去左断崖神庙，5分钟车就到了，3千门票，唔可以露出膝头哥，否则要用围巾包住。我地包好之后，就有个老太主动过黎话帮手驱赶马骝，我地细细声商量话比5千小费，点知个老太好似听得明我地讲野甘，马上话要5万，甘我地当然就唔要了。神庙系好多马骝，我地好小心甘行，跟住大队走，行左9个字行晒，基本不太多野睇。

去完断崖神庙之后再出发去情人涯海滩，点知司机话唔知系边。经过打电话问功课同问现场观众之后，终于知道大概位置。按指示去到一个有指示牌既路口入去，竟然系去到一个酒店既后门！酒店staff同我地讲，去海滩系另外1条路，但系条路好难行。我地抱住姑且一试既心态，去到果条路，发觉真系好难行。而旁边有一条大路，既然都黎到搵左甘耐，点都要搵下，我地就叫司机开入去。行左入去好长一段，最后见到一个铁闸，先知道系死路，始终都系冇去到海滩。结果，系浪费左差唔多半个钟之后，同司机讲直接去库塔了。

下午2点半去到库塔海滩，我地话要行P1、P2巷同雷安大街，个司机话果边好难停车，之后就直接开左入P2巷，而且系成条P2巷行晒。之后想带我地去另外一个市场，我地无理到，最后叫佢系P1巷口停左车，我地落车自己行，约好大概7点再接我地去Nusa Dua。

我地先去海滩行左一下，海滩好长好大，但系唔算干净，个海比较细浪，的确好适合冲浪。以后行入P1巷，都系卖冲浪同纪念品，完全引唔起我地问价既欲望。系P1巷无意间见到bamboo corner,价钱真系好平，两碟菜加两杯果汁先3万1，唔使税同小费。之后继续行左去库塔广场同discovery mall,都无咩吸引。唯有一间女仔用品店叫做有D野睇，价钱又合理，我地买左几个发夹同指甲贴，合计3万6，虽然都系中国制造，不过好精美。

行到大概4点半，我地开始系海滩附近稳有冇海鲜吃，不过行左好耐都无见到，最后都系去翻中午果间，叫左两只蟹，一碟咖喱虾，一碟菜，一个炒饭，两杯果汁，合计10万1千！劲抵加好吃！

5点准时开始落雨，我地系冒雨冲入Bamboo Corner既。落雨一直到6点9都落紧，我地唯有电话司机开车去巷口接我地，点知司机话停车唔方便，叫我地行去前面1百米果度既pizza hut。冇计，唯有冒雨行过去！劲唔爽！

上车果时已经七点了，出发去Nusa Dua。路上又有D塞车，最后八点到到酒店，比左包车钱35万，唔系比美金，又亏了。间酒店的确有D难稳，主要系晚上路牌不清，但系环境非常好，房间好正好干净！系巴厘岛最满意既一间，我地比左1刀酒店staff做tips。

入住后，酒店设施好好，房间好新同设备好齐全，有LG既Hifi仔同Sony既LCD，洗涤用品好干净同高档，餐具等等一应俱全，仲有果盘，每日一盘，作为Villa黎讲相当好了，系甘耐以黎最好既一间，搞到我地觉得2晚太少了。不过由马路行入房间要3分钟，lobby就好近马路，门口就有minimart，旁边有换钱既地方，而且都有人招揽的士生意，价钱都好公道。

训觉前sms John既代表Wayan，约实听日早上9点大堂接车去玩watersport。然后训觉！

foxchildren · 2011-04-10 13:25

2月3号 Nusa Dua、Watersports

（由于今日水上活动为主，而且Nusa Dua既海滩完全激唔起我地影相既欲望，所以相就欠奉）

早上8点起床，早餐准时放系门口既台上，但系好多苍蝇，虽然有罩盖住都顶唔住，所以我地马上罗左入房，不过都有其他人系就甘系门口吃既。早餐系健康早餐同印尼风味早餐，分量非常足，饱！

吃完早餐罗左用品，9点半出到lobby，发现John既车未到，打电话催左一下，5分钟部车就到了，系部7人Van。上车后被告知仲要接多一批客。行左5分钟左右，去到Novotel，接左1家8口印尼当地人（3个小朋友）。再行左5分钟左右，就去到玩水上活动既海滩了。

9点9去到海滩，司机将我地交左比一个staff之后就走左，staff带我地去租左locker，5万一个，贵！放野果时我地已经发现海滩劲多人！仲要系中国人！非常热闹！出到海滩边，海滩仲热闹，好长一个海滩，基本上都系watersports既。我地从staff手上罗左6张飞，对应3项活动。

10点半左右，开始玩第一样，Fly fish，亦都系最唔好玩既一样。首先排队坐船出去海上，然后等fly fish既大气垫过黎，两个人一个垫，仲有个技术人员系上面负责平衡。上左去之后，另外一条快艇拉动大气垫，足够快果时气垫就飞起身，个技术人员会控制飞行高度同配合落水时间。飞行时间大概10秒，高度可能有5米。总共飞左2次，其实就唔刺激罗！

玩完fly fish之后念住去玩parasailing，点知被告知冇风，要等，见到非常多人排队，我地决定去玩水上摩托先。去到又系排左一阵队，跟住1人1摩托，仲有个staff跟住帮你开。佢先开出外面比较少人既地方，然后就交个油门比我负责，佢负责方向，如果你觉得自己控制埋方向都可以，可以同佢讲，睇下佢肯唔肯。之后我地开摩托，个海比较平静，我地开到鬼死甘快，Renee开始念住慢慢黎，个staff叫佢开快D。中间经过有2个金发靓女划单人艇，个staff专登飞起D水溅佢地。大概开出去有1公里左右，就掉头翻黎了。因为开得好快，所以全程估计时间只有5～8分钟，肯定冇所谓既15分钟。Renee由于技术比较好，基本都系自己控制方向，各位可以争取下了。

玩完晒之后再去玩parasailing，有风了，不过都要排队。今次等得比较耐，可能有20分钟，先上左一条快艇，同1家法国人以及1对印度情侣，加上我地就系一个多国部队了。开出去15分钟左右，去到一个半月形既突出海面既沙滩上面。上到沙滩都系要再排队，1条快艇拉住个降落伞，人就绑好安全带，同埋左手戴蓝色、右手戴红色手套，降落果时睇旗号既指示，红色旗号就右手用力下拉，蓝色就左手。如果佢发觉你太轻或者风太大唔容易着落，会多一个staff系你身后一齐飞。印度女仔就好难先落到黎，而且差D落左系个凉亭上面，要7～8个人一齐去拉佢个伞先拉得住。我同Renee系最后两个，Renee上果时好大风，所以多个staff，大概5分钟，飞起下降飞起下降2次就降落了，感觉飞得唔够高。我飞都有个staff系身后，好大风，上左天之后一D都唔惊，据Renee讲飞得几高，然后唔知点解系海面降落左2次，2次都飞到落海面，第二次干脆就落左海冇起水。开始以为系专登等你觉得刺激D，后面上船先讲，太大风，冇办法系陆地上着落，所以先系海上降落。个staff一直同我讲唔好意思，态度好好。上到岸同我地同船黎既都走晒，得翻我地两个，唯有等船了。等左有15分钟左右船黎了，但系慢船，所以用左20几分钟先翻到岸。

岸上依然多人，我地拿拿声换左件衫就罗野走了。因为念住唔系好远，而且又想沿路行下，睇下有乜餐厅同Spa，所以就冇叫John既车送我地翻去。行翻去大概30分钟，中间有好多间Spa同吃饭既地方。Spa价钱有平有贵，大概系Ubud既1.5倍左右，但系环境感觉就唔会好好，都好细间。部分餐厅见到有海鲜，其中有1间龙虾10万，另外就系好正常既印尼餐厅。最后系我地酒店既门口有一间好好环境，睇起身好干净企理既餐厅，海鲜篮35万含税，有1只300g龙虾、2只蟹、6只虾、1条鱼，2串鱿鱼，同金巴兰既差唔多，但系平左1半！

翻到酒店洗完白白都2点了，出翻门口间餐厅点左海鲜篮，cocktail buy 1 get 1 free，所以我地选左2杯，合计40万5千。呢一餐价钱几好，但系非常多苍蝇！吃既过程中不断赶苍蝇，非常烦！其中一只仲飞左落Renee杯野度，通知waiter换左1杯，并点多1个驱苍蝇蜡烛。成间餐厅冇人，得我地两个，包场，然后D野点左差唔多成个钟先上，的确系即叫即做啊。味道不如金巴兰既特别，但系反而几好吃。

吃完差唔多4点，向南行，大概行左20分钟，睇左几间换钱既rate同问左一下打车去机场几钱（8万），最后系一间官方既换钱店以1比8950换左200美金，并以4千买左1只1.5L既水。

翻到酒店5点，book好听日既早餐，发觉泳池冇人，我地换衫去游水，到6点几天色比较黑了之后起水。游水途中见到另外一间屋既韩国佬同老婆吃杯面，我地突然发觉呢几日都大鱼大肉得好紧要，所以游完水冲完凉，出去minimart睇左一下，发觉杯面都唔系好贵，几千到1万，于是买左2个杯面同奥利奥，合计2万4千。

系酒店吃完杯面睇左一轮American idol Se10，之后训觉。

foxchildren · 2011-04-10 13:38

2月4号 龙目岛、Sengigi Beach

今日既任务就系从巴厘岛去龙目岛。

早上9点起床，执左一轮野到10点早餐送入黎，今次叫左美国风味同印尼风味，结果发现同寻日既冇咩分别，风量依然好足够！

吃完执好野11点3，拉行李出去大堂暂存，然后出去门口minimark买2个杯面、1条oreo、2个面包，合计3万1。途中有个的士佬问去唔去机场，开价8万，唔肯降价。价格都合理就成交，11点半准时出发。

路程其实就20分钟，但是会塞车！所以都成12点3先到机场。比左5千做tips，条的士佬系本次巴厘岛租车之中英文最好，态度最好既一个，部车虽然旧D，但系气味好好，唔会焖焗。

系机场办check in，好快搞掂，机场冷气唔冻，比室外低小小而已。入去里面睇左一集flash forward就可以登机了。飞机系双翼螺旋桨，比较细部，准时2点出发。

30分钟好快就过去了，2点半准时降落龙目机场，机场好细，冷气都系唔冻，行李带就得2条。罗左行李出去马上就有好多旅行社了,问左去Holiday Resort既的士费要8万3千5，然后再咨询Gili三岛游既价钱，有开价160万、60万都有，比较混乱。最后我地同旅行社罗左卡片就走人了。

去酒店系沿住海边一路往北，每过一个弯就见到1个海湾，每个海湾都有自己既酒店，非常幽静同干净。

去到酒店3点半左右，比左5千tips司机，酒店staff就比左1刀tips，酒店唔系处于Sengigi beach既中心地带，所以比较幽静同埋外面都冇restaurant即minimart，起码要打车10分钟先有。我地放低行李先煮左个杯面吃，我地间房系二楼，向海，虽然睇唔到海但系向园景都好好feel。

吃完之后我地开始行酒店同海滩。酒店好大，有自己既潜水学校，SPA，3间餐厅，环境好好，睇房间装饰酒店应该有5、6年历史了，但系保养得好好。酒店有自己既私家海滩，我地行到出去发觉海滩真系非常宁静，系冇人既果种，成个海滩除左我地就只有一对白人母子。海滩沙偏黑色，有D似澳门既黑沙海滩，浪就唔算好大。我地一路向北行晒成个海滩，到最后一个悬崖既地方见到有当地既3母子系度玩水，乐也融融。

大概行到5点半我地翻翻到酒店海滩既入口，有个船家过黎问我地要唔要包船去Gili3岛浮潜。倾左一轮价之后，我地包单程船，3个岛任潜，50万搞掂，价格应该都公道吧，10万做deposit，船家好正规甘开左2联收据比我地，一睇其实系旅行社代理。但系当时我地唔记得讲明要救生衣，所以第二日船家就冇配了，亏！

倾好晒我地就翻酒店准备去游水了。罗好野去到泳池我岩岩落水，Renee岩岩打开NB准备睇Flash Forward，又开始落雨了，仲要系好大既一场雨！真系顶！我地等左一阵雨，大概都6点半有多了，见雨细左小小就冒雨冲左去BBQ吧果度，稳左个位坐低吃饭了。

可能系因为之前两日连续吃海鲜，所以我地都有D滞，所以点左1个Pizza就算了，叫左1杯Bloody Mary同另外一杯饮品，埋单都要19万。其实当日都有自助餐，先13万5千一人，有烧烤、水果、点心、饮品，其实都相当丰富了,价钱又合理，如果我地吃得落就真系会选自助餐囖。餐吧仲有乐队演唱，由于见得我地两个系中国人，叫我地点首中文歌，我地都唔知点咩好，结果佢地自己就唱起了，系邓丽君既《月亮代表我的心》！唱得都ok啦，结合埋气氛都好有feel。然后佢每围台都行过黎叫点歌，我地又点左首《you r beautiful》唱得就麻麻了，不过同后来系Gili岛上果间既比起身就好好多了。唱完我地比左2万Tips，毕竟农历新年嘛。

吃完饭差唔多8点了，我地就翻房，整理一下行李，吃左一阵水果同睇左阵Flash Forward之后就训了。

foxchildren · 2011-04-10 14:11

2月5号 Gili Island、Snorkling、Villa Ombak

早上7点半起床，执好野8点半去吃早餐，系自助餐。

好多人啊，据说今日有一个公司活动，成300人包场。吃早餐既时候都见到有旅行团过黎入住，其中见到三两个国人。早餐种类算中等水平，该有既都有，味道都唔错，我地念住中午果餐都唔知几时吃，所以都系吃饱D好。

吃完都9点3，行到去沙滩既出口，个船家已经等左好耐甘样了。我地叫佢再等多一阵，我地翻房罗行李check out先。Check out之后去到船家等我地既地方，船家帮我地罗住行李，带我地南行左100米之后就上船了。只船比我地寻晚选既果只细D同残D，不过都冇计了，因为寻日话好多穿一早就比人book左，我地太迟订了。

其实条船好大条，可以坐到10人都冇问题，我地放左行李上船后，船家罗左个好大既塑料袋出黎，帮我地盖好晒D行李，同时仲有另外一个唔识讲英文既负责开船。

落海出发已经系9点半有多了，出到海先发现我地部船系行D好慢既，不断有船超过我地，真系顶！个海会好大浪囖，抛下抛下，吃完早餐就真系好顶瘾，如果唔系我地带左广东驰名老牌小吃——九制陈皮！都可能会获利回吐了。海浪不时打上船上，不过唔大，我地D行李有塑料袋保护都冇湿到。

我地系先去Gili Air，再去Meno，最后到T岛送到酒店。沿途所见，龙目岛有好多海滩，几乎每个海滩都有一两间酒店，都好安静，确认系比巴厘岛更适合Hea既海岛。

用左足足1个钟头先去到Air，去到Air我地首先停船系岸上，沿岸有条比较烂既路，有当地既马拉车，同埋好多酒店，仲有唔少鬼佬系度叹海滩，好休闲。我地落船之后，船家带我地向北行左起码有200米，就话可以落水了，我地想租左件救生衣先，船家话唔需要，海水浮力好大，我地犹豫左一阵就信左船家落水了。

船家同Renee系前边开路，一路带我地游出外海，海水的确好浮，我地浮系水面都唔使点样用力就可以浮了，连续游左成半个钟先去翻我地落船果度，完全冇休息过，我地有D唔系好习惯，觉得有D攰了。我地先系岛边影左一阵相，休息左15分钟之后就出发去Meno了。

船行左15分钟左右，就到Meno了，我地冇上岛，而系直接落海了。首先潜左大概20分钟，我地系一个比较高既珊瑚石上面休息左几分钟，再继续潜左20分钟就翻上船了，我念住系T岛唔会有更好既景致，就同船家讲再去潜左一阵。船家带我大概再潜左15分钟，见到2只海龟，真系比较Lucky。最后上翻船去T岛。

船又行左15分钟左右，到左T岛，船家又系停船上岸，然后好似想向我地收钱了。我地冇理佢，首先话要系T岛潜一潜，甘船家都好配合，带左我地再向北行左又系200米，途中我地发现有个路牌指明系潜点，后来先知道就系著名既Manta Point。行到冇咩船既地方就落水了，今次潜左30分钟左右，见到1只好淡定甘系度吃野既海龟，完全唔理我地，由于距离好近，我地见佢吃得甘落力，都有D担心佢会唔会冲过黎咬我地咖。最后，我地系落船既地方上水，潜埋今次就真系攰了，上左船就叫船家开去Villa Ombak。

船行左10分钟就到酒店reception对出既海滩，船家帮我地罗野落船放入酒店，我地比左40万尾数，就同船家say good bye了。其实船家都真系几好人既，觉得比巴厘岛既司机好D，呵呵！第二日我地又遇到船家，佢话翻去逆风，开左成1半钟有多先翻到Holiday Resort，睇黎我地当时既安排都好正确啊。

入到酒店Lobby，Staff confirm 左我地张Voucher之后，一人送左一个鸡蛋花编织成既花圈以及welcome drink，话因为我地系honeymoon所以特别准备，几nice 啊。然后办好入住手续，Staff比左一张早餐coupon我地，呢个就系一个错误既开始了！搞掂晒之后Staff带我地入去了，穿过晒成个酒店，原黎我地间房系最入面既地方，好安静。

入到房都成1点几了，房间床上摆放左好sweet既装饰，个房其实好大，但系个洗手间占左一半！真系晒。房间环境装饰都好新净，基本用木做家具，其中有一个木做既晒衣架，呢个又系另外一个错误既开始了！系洗手间里面有每日promo活动既介绍，我地见到听日Spa有九折，打算晚上去睇睇。

放低行李就开始梳洗，搞掂都成2点半了。呢个时候酒店送左个果盘过黎，好大一个，有成个菠萝、红毛丹、提子、香蕉、苹果等等。我地基于当时唔三唔四既时间，决定吃一条Oreo同吃筛D水果就当午餐了。

吃完hea完大概都成4点了，我地就开始行出去。酒店其实系处于岛东南部既海边，再往南行就只有1间叫kokomo既酒店了，往北就进入T岛既繁华地带，大量酒店，restaurant、tour agent、store、bike rent分布系沿海既路边。路就比较细，可以并排2部马拉车而已，同时D路一个坑两个坑，又有水，真系唔好行囖。我地向北一路慢慢行，选下晚上吃饭既地方，同时租左两步单车，5万1部每日。呢度D单车都比较鬼佬size，20寸既比较少而且车况唔好，仲要无论新旧同尺寸都系5万，认真唔抵。

租左之后再向北踩，一路经过1个好似码头但系唔系码头既地方，同埋一个唔似码头但确实系码头既码头，再经过1个海龟保护计划既展览馆，我地参观左一下并捐助左5000。出左展览馆好快就见到大量租用潜水用品既店铺，包括救生衣都有。我地一路踩到中午既潜点，前面既路更难踩，而且又开始准备落雨甘头，我地就冇再去了。

一路踩到翻酒店真系落出雨了，我地就担遮出去稳野吃，由于落雨好多原本海滩上既位都冇开到，最后我地选左我地住既酒店经营既Blue Beach Cafe，系最靠近海边既位置坐低吃饭，当时6点。

6点仲系happy hour时间，我地叫左1杯啤酒，1壶wedding tea，1个牛扒，1个nasi，即系印尼炒饭，一路睇住个海，睇住D雨，听住队乐队唱紧巴厘岛当地音乐，享受我地既晚餐。其实晚餐唔算做得好好囖，牛扒5成熟上到黎点睇都9成有多，炒饭都系甘上下不过不失，个Wedding tea就系闻起好香饮落冇味既绿茶，啤酒唔同古典珠啤有得fight——甘苦，我中意。由于上菜比较慢，我地就翻房罗左部NB出黎上网。大概半个几种之后上菜，我地吃完就7点了，因为气氛好好同仲落紧雨，我地各自点左野饮，继续上网，Renee用NB写游记，我用手机写。最后坐到8点，埋单合计21万几。

翻房途中我地去Spa了解左一下，价钱系Zen既1.5～2倍，仲要系未含税价，打左九折就即系唔使打税。不过考虑到日惹既Spa条件，Renee都系选左个Balinese Tradition Massage，合计25刀或22.5万，预约听日中午12点做。

入到房再次梳洗，并洗好左衫，然手浪左系个晒衣架之后，睇左一阵MTV Asia就训觉了。今日比较充实啊！

（本月流量又用完了～下月继续努力！）

foxchildren · 2011-05-26 15:12

2月6号 Gili Trawangan、Snorkling、BBQ

（今日又系水上活动，加上天气唔好，所以又系影左好少相而已）

早上8点半起床，梳洗完9点半执齐浮潜用品就踩单车出去吃早餐。比左张coupon个staff之后我地就去罗野吃，都系自助餐，品种比Holiday Resort少D，不过都足够了。我罗完翻黎见Renee比个staff叫左去，好奇怪。过左一阵，Renee翻黎，话酒店check到我地系唔包早餐既，吃早餐要15万1个人，即系30万合计，顶佢个肺啊！！！！我地仲以为见我地系honeymoon，免费送我地早餐，结果变成到目前为止吃得最贵既一餐早餐。

吃完早餐10点，我地先去towel counter罗左两条毛巾，然后就出发去Manta Point了。先停车系海龟展览馆，然后我地租左2件救生衣，倾好租半日，合计3万。救生衣就好新净，比菲律宾既好好多，大小尺寸都有。租好了就落水了，物品就甘放系岸边就系了，治安好好既。首先潜左一次大概30分钟，自己发掘边度有鱼鱼，真系好有意思，搞到好想以后去深潜。30分钟之后我地上岸休息左一下，再落水了，呢个时候发现居然有巨量疑似水母既透明浮游生物，劲得人惊！我地开始以为系局部地区性问题，就往人多既地方游，结果都系甘，确实好核突，我地唯有上岸。上到岸已经11点半了，岩好遇到寻日个船家，佢今日带1家5口俄国佬过黎Gili三岛游，我地问佢果D系乜，佢话系jellyfish，冇毒，我地安心小小，不过翻黎一查，确实系水母仔～～～～

见时间都唔早了我地就还救生衣同翻酒店，Renee简单洗左一下就去做Spa了，我就系房间整理游记，之后睇左一阵Batman The Dark Night。

大概到2点Renee翻黎了，我地各自吃左个杯面，准备出去泳池游水hea下，点知开始落雨，搞到我地好无奈，唯有叫人过黎make up房间，我地就系外面睇Batman。

睇完差唔多4点亦都停雨了，我地就出发去外面还车，并且了解下听日出发龙目岛机场既安排同费用。

还左车4点半多D，再问左一下去机场既安排，如果跟agent既安排，7万5千1个人早上八点出发，去到龙目bangsel码头之后8个人一部车去机场，一日只有一班。如果系2人包车计，就17万5一个人，随时可以走，由T岛去bangsel码头既public boat系1万一个人，满25人就开船。由于我地系下午飞机，如果一早就去会有太多时间系机场，包车又贵得离谱，比较之下我地决定都系自己坐船去到码头再稳车。

然后我地行左一下买左4个杯面2万，1条饼万五，之后大概5点度我地系酒店对出既海滩上稳左个比较安静既沙滩椅坐低，对住个海放空，好relax囖。一直hea到6点，天开始黑了，我地先开始开始去稳野吃。

比较左3间吃饭既地方，最后都系翻去Blue Beach Cafe，吃佢既BBQ，同时可以享用Buffet，我地觉得今日比较有胃口了，同时后面去到日惹可能冇甘好环境享受了，所以今晚要吃餐好既。

首先睇左下海鲜，龙虾吃到有D厌了，虾就唔系好抵，3只就10万了，最后我地选左一条好似箭鱼甘样既鱼，1条20万for two persons包Buffet，然后再选左个最靠近海滩既2人位，开始今晚既晚餐。Buffet种类唔算多，不过有steam rice同汤，比较好，水果都有好多，同埋一款几好吃既朱古力蛋糕。条鱼烧有D耐，我地吃左几轮野先上，条鱼真系烧得好新鲜，好好味，比之前吃过既烧烤都好，20万非常合理既价格。由于条鱼实在太吸引，我地吃到得翻D骨甘上下先醒起，原黎我地未帮条鱼影相，拿拿声罗相机出黎，留底条鱼既镜头。我地吃到8点基本吃唔落了，再叹左下个海滩，就埋单了。

埋单后我地再往南去行左下海滩，经过一个好有情调既亭，岩好set紧一个好Romantic既用餐环境，我地问左下工作人员，原来系有人订左酒店提供既package，真系好有情调。我地影左一轮相，再听左下海水声就翻入房了。

翻到房冲左凉洗埋衫，晾好，都11点了，就训觉了。

foxchildren · 2011-05-26 15:15

2月7号 Lombok Island、JOG

（今日系移动日，基本冇影相）

原来打算早上七点起身去浮潜，但系都系太眼训，而且念起昨日既大量水母物体，都系取消左计划。最后九点三先起身，Renee 吃左个杯面当早餐，我就无吃野。之后执好晒野11点退房，由于美金我地只有100既面额，前台冇办法找开，就比左22万5千Spa费用。免费寄存左行李之后出去码头买Public Boat既船飞。

去到码头，个Staff话岩岩15分钟前走左一班，依家未有人排队。我地问左价钱1万1个人，够25人就开船。念住未有人买就无买住，同时仲有个老鬼佬一齐咨询。问清左情况之后，我地行翻转头去码头傍边既一间墨西哥风味餐厅吃午餐。我地点左1个印尼炒饭加柠檬汁，1个墨西哥肉酱白饭加草莓汁，合计7万8。足足整左9个几字先上，中间我行翻酒店罗寄存既行李。D野吃上到黎就比较一般，我地非常庆幸寻晚冇系呢度吃。

吃完饭12点，去码头再买船飞，已经有18人了。买好飞翻墨西哥餐厅罗行李到码头等左10分钟就出发了。

Public Boat系冇完全停上岸既，因为冇码头甘既物体，我地要间水上船。条船都几大，位置就一般干净而已，搭船既基本都系本地人，另外有4个鬼佬，一船成40人出发。

个海好大浪，条船抛下抛下，有时船家仲要停左个motor等浪过，其实都几唔舒服，不过有2个鬼佬就爬左出船头，好enjoy甘样。

坐左半个钟头船，去到海滩码头，非常大浪，条船又停得远，好难落船。后来将一件行李比左个靓仔先跳到落海滩上，但系都搞到裤湿左，为此仲比左5千小费果个帮手拎袋既靓仔。但系Renee个袋仔都系湿左，里面既机票都湿埋，激气！

行上码头既过程中条靓仔不断问我地使唔使包车去机场，开价20万两个人。一上码头仲多人围上黎，开价都系20万。我地开始冇理佢，入去码头睇左官方价11到13万一个人，冇发觉有taxi服务，再行左一下外面路边唔见有的士，又唔知要行出去几耐先有的士，就同包车佬倾左一轮价，14万两个人，要我地立刻比晒钱，感觉好似上左卖猪仔车。果然，行左两米同船既另外1个鬼佬同1个当地女仔上埋车，变左拼车，唉。

去机场所行既路唔系沿住海边既，而系入左山，中间仲有一个地方要避让车，不过我地就见左一下龙目岛既山景。

车开左大概半个钟多D就到机场了，果时大概2点钟。机场真系好细，入到柜台被告知未够钟check in ，系外面稳位坐，饮左下水，写下游记。

等到3点，办check in，效率比较低，搞掂晒入到Waiting Room都成三点半，行左一阵商店，就稳位坐低睇flash forward。睇左一集就四点半了，点知今次遇到delay，到五点半先出发，系747机，我地岩好坐安全通道位，好宽卓，正！

到泗水都六点九了，当地时间应该系五点九。落机好快就去到转机柜台，一阵就搞掂了。泗水系大机场，冷气好劲！之后去其中一间铺头买左支茉莉花茶同一条oreo，合计万六，平过龙目机场。之后过安检入候机室，发现居然有热水！早知唔使买水同可以吃杯面了！到六点半准时登机，发觉机场d staff英文比较差，同埋成个机场都吴见有鬼。

七点准时起飞，飞机又系螺旋桨。机上好闷局，又岩好系螺旋桨位，好吴舒服。

八点落机，罗行李出到外面，有一个正规既的士服务站，以及好多自由兜客既的士佬，秩序都算好。系柜台买左去酒店既的士飞，5万5，后来睇翻距离都合理。搞掂的士就去旁边既旅行社问听日包车既价钱。比较左两间之后最后以37万5成交，包车游市区同去普兰班南，最后放地我地系婆罗浮屠既Manohara酒店，定好听日中午12点到酒店接，比左20万上期。

九点出发，左兜右兜去到酒店九点三左右。从外观上睇，酒店都几好，比左18万之后入房，实在系非常老旧既酒店，大概系招待所既水平，好难接受，味道比较重，睇起身都唔干净，失策啊！！！

我地勉强放低左行李马上出去吃饭。问Staff被告知附近有一间，行左5分钟就到了，又系一间bamboo house，价钱同Kuta果间一样甘平。我地点左一个咖喱椰汁鸡比同一个烤鸡比，一壶茶，埋单6万，味道非常好！吃饭期间同司机约早到11点接，送我地去万宝路稳酒店。

吃完大概10点半翻到酒店上网，速度奇高，因为都无人用。上网查左两间系万宝路大概35～40美金既酒店，准备听日去睇下。之后想冲凉发觉无热水，问staff被告知要听朝6点先有，唯有洗脚刷牙洗面训觉，都成12点半了，真系天堂地狱啊～～～～

foxchildren · 2011-05-26 15:34

2月8号 JOG City、Prambanan

终于开始本次旅程既最后一站·日惹了～时间过得真系快～

早上六点就听到有人唱歌！原来系拜神！睇黎日惹确实系印尼既文化中心，好有传统啊！

既然先六点梗系继续训翻咖啦。到九点，起床去前台问左下时间，原来有时差，先八点。继续训到九点，终于起床冲凉执野，到十点出去吃早餐，系一餐好正常既早餐，就2片面包同1只煎蛋，加杯茶同两片水果。

吃完之后我地见时间尚早就去外面行下。沿住条巷一路行出去，发现附近原来系街市，好多人力车佬问我地，包去皇宫，水宫及另外一个地方，1万两个人。我地好艰难甘撇开佢地一路行出去，一直行到去外面马路，见到一个路牌，发觉原来我地住紧既巷有超级多既Home Stay，睇黎呢度都系驴友集中地。再行左冇几远就见到几间超市了，我地入左一间K仔，发觉呢度d野好平，系印尼我地去过既几个地方钟最平既。杯面先3千几，Oreo先8千几，我地系龙目买既严重贵啊！我地买左三个杯面两个面饼，一条早餐饼，一条Oreo，先合计2万8千9。

之后原路行到翻酒店都10点9了，部车都黎左。我地退好房之后出发，同司机讲去万宝路稳酒店先，佢都好专业，先介绍下我地住既呢度比万宝路好，安静、经济、就脚，又问我地预算，再带左我地去睇两间，但系我地觉得环境都唔好，卫生又差，就算了。

大概11点半正式开始一日游，先去左一间蜡画（Batik）店，其实系购物点。Batik系当地既一种民间艺术，具体黎讲就系一种印染工艺。首先系系布上按需求涂上特制既蜡，然后浸入染料，冇上蜡既地方就有色了，然后如此多次反复，就将需要既颜色都染上布上，最后形成一幅画，非常多既工序先可以搞到一幅画出黎，我地见到店内最大一幅系4m×2m，壮观！我地去到既时候全店得我地一台客，个店主好有耐性甘同我地解释Batik（反正一台），同埋话D画系学生整既（童工？），要成个月先做到一幅。我地见又几靓，一块布携带又方便，最后买左一张，讲价由13万降到9万。其实后面日惹既好多景点都有Batik卖，不过价钱都差唔多了，所以主要仲系睇个人喜好。

睇完Batik，司机又送左我地去一间纪念品店（又系购物点），D野唔吸引我地就无买野。呢个市区游就变左有购物点，之前真系冇倾好，浪费左我地既时间，搞到下午去少左地方。

过左2个购物点就去皇宫了，我地大概12点到皇宫，2万6千门票含1千拍照许可。入去行左近2个钟，去埋睇左蜡画同水牛皮影画既制作工艺，基本上成个皇宫我地都行匀了。呢度皇宫既规模就唔大概，历史亦都唔悠久（相比中国），都系果句，唔去后悔，去左后悔。

下面呢部甘得意既车，系我地系Batik制作坊门口见到既，好有趣。我地问可唔可以踩下，Staff话要同所有者商量，比D钱应该可以，由于时间关系，以及踩部甘瞩目既车出去，实会有“好难忘”既回忆发生，所以都系算啦，影下相大家欣赏下啦。

去睇Batik果时，系一个当地男人不断招呼我地去既，唔知系唔系国内经历得多，搞到我地觉得佢好有企图甘，又怕要比tips。事实证明，冇事既。

睇完皇宫，马上就去水宫，好近，车程10分钟都唔使，门票1万5含1千拍照许可。由于时间唔多充足了，我地就快速行左15分钟。水宫其实就系皇宫既后院一部分，有两个大泳池，话说系皇帝避暑胜地，睇睇我地既承德避暑山庄，真系蚊同牛比了。

睇完出翻门口，我地叫司机带我地先去万宝路睇酒店。首先去左我地寻晚系Agoda上面睇好既1001，点知去到已经full晒，唯有跟去左当地既一个代理介绍既Home Stay，好近行左两步都到了。入房睇都可以，起码无味同干净，我地费时用甘多时间系度，而且都肚饿了，反正都系一晚，就25万订左酒店同放行李，之后出发去普兰班南。搞掂晒都3点了。

我地原本打算系住既地方附近吃左野先，但系司机话佢唔熟呢度，话普兰班南好D，就带我左我地去。开始话要1个半钟先到，搞到我地系车上又吃左一条Oreo，点知大概半个钟就到吃野既地方了，都唔知系我地听错定佢讲错。吃法既地方系一个小吃店，我地3万6点左两个汤面，味道一般般啦，分量都系一般般，不过系印尼就一次吃汤面甘大吧，点都要试试。

去普兰班南既路上司机好敬业甘不断向我地推销佢地公司的旅游产品，以及问我地买唔买普兰班南同Ratu Boko既门票，话Ratu Boko既可以包埋sunset dinner，由于前景唔系甘明朗，我地冇理佢住先。

我地吃完面就出发，五分钟就到了，去到一问已经无套票去普兰班南同Ratu Boko了，单普兰班南就要13美金一个人，而Ratu Boko就要10美金。既然如此，我地同司机倾左一下，决定都系从他果度罗飞啦（帮下人嘛），13美金1张，如果赶得切就去Ratu Boko庙睇sunset，反正去到先比钱，冇任何损失。

系入口咨询既时候，有个德国佬同西班牙妹过黎约我地一齐租导游，6万两份分，我地应承左。比左飞之后就入园了，我地跟住导游行，条友英文几好，虽然好多宗教既内容，我地都听到一dd。普兰班南其实成个区好大，来回行晒要2公里，仲有一个酒店系区内，导游同我地解释左一下距离同时间关系之后，只带我地去左个主庙，用左1个钟同我地讲解。期间好多当地中学生一齐参观，其中有几批稳同行既鬼佬鬼妹影相，明星甘，相当夸张。导游结束后已经五点，我地决定唔去Ratu Boko了，就系园内行下，影下相。

到六点我地出翻去，系出口既纪念品档用5千买左开价1万既木制人力车模型，4万买左开价12万既百家布背囊，再次证明系印尼需要按3分1既比例讲价买野。仲见到有用水牛皮整既灯笼，但系尺寸唔岩，好想买翻去左床头灯既灯罩。穿过晒纪念品街，出到外面就系车场出口了，司机已经等紧我地，上车飞奔去婆罗浮屠，预计八点到。

一路上司机不断听对讲机交通情况同火山既情况。七点遇到塞车，好彩只系十分钟。路上见到好多火山爆发摧毁房屋既痕迹，同埋火山岩，不过夜麻麻睇唔清。司机又系度sale佢地公司既火山景观游，真系搞到我地都有D烦，点解变左跟团甘。

7点9去到酒店，外观都几好，好大间，都有welcome drink同free WIFI系房内。同前台问左翻市区既方法，个Staff好熟悉甘同我地讲，要先坐中巴车1个半钟，去到一个bus terminal再转city bus，半个钟去到万宝路，比较周折，我地要再考虑下听日点走。

入到房8点半，每人吃左1个杯面同1个面饼，面饼相当唔好吃，虽然先千八文。房间WIFI速度好好，但系装修就好旧式了，还好比较干净。电器都系日本仔野，令我非常怀疑呢间野系日本援建既。

上网冲凉大概十点半就训了。听日准备七点闹钟起身。

foxchildren · 2011-05-26 15:40

2月9号 Borobudur、St.Maliobor

最后一日行程了～～～～～～～～～

早上七点起床，打开阳台门见到外面阳光明媚，直接就对住吃早餐既地方，好方便。好多人已经开始吃早餐了，系自助餐，我地估计呢班人系睇完日出翻黎既。

八点半搞掂晒出去吃早餐，品种唔多，估计同时间有关系，炒饭几好吃。有个Staff帮手整左个omelet同煎蛋，同埋有比较少见既番石榴汁，味道唔错。

吃到9点3吃得好饱，开始入园。酒店好近婆罗浮屠既主体，行坐10分钟就到脚底了。婆罗浮屠本体游览时间大概需要1个钟头，行埋另外两个讲印尼海洋贸易同婆罗浮屠修复历史既博物馆，合计2个钟。系博物馆内都有好多卖纪念品同T shirt既铺头同走鬼，但系佢地开价好离谱，T shirt最平点都要5万，Renee睇中既要7万，质地又唔系好好。我地有之前既经验，一路去到出口既纪念品一条街，先至买左两件T shirt，合计5万，Renee仲同卖t shirt既女仔合影左，个女仔听D歌都几in几有taste咖。

(本月流量又用完了～不过好快就可以继续了～～呵呵～～)