自 然 派 • 迈 生 活

枫林晚箫 · 2012-02-04 13:13

初二嘅深圳十分清冷，我哋成村人着晒冷衫同打底裤，都有D打冷震。好彩借咗朋友嘅两地牌，唔使转车，一落车就冲入候机楼，至于我，哽喺煲翻枝烟先啦！

枫林晚箫 · 2012-02-04 13:31

候机无话。一上到飞机坐定，两个女人就开始叽叽喳喳，开始chok。领导俨然心情relax，而michelle好似无训好，眼神带D疲倦。

HK到Bangkok差唔多两个半钟，去咗餐饮嘅活动，都算轻松，睇，两个女人一落机即刻生猛晒，两只龙虾咁。

因为我哋坐联程航班，响香港就将Bangkok到Chiangmai嘅check in 办埋，唔使喺Bangkok多停留，一落机就办入境手续，杀去登机口就得。

估计大家都知我既无地位啦，咩埋背囊拖两只箱，隔离领导成个Lady Gaga（Q版）咁嘅款，无计啦。。。

枫林晚箫 · 2012-02-05 10:35

D1：朝发晚至辗转途 三千里路云和月

到清迈，就即刻转车去派。马来仔之前已经联系好AYA（泰国著名嘅旅行营运商，提供包车、租车等业务，

口碑唔错）。一出机舱，一阵热浪扑埋嚟，我同马来仔仲着住打底裤，成只裹蒸粽咁，迫不及待扑去洗手间，两人

相对一笑，迅速剥裤！隔籬嘘嘘嘅泰仔见到我哋嘅动作，吓到傻晒，条水龙chok下chok下，以为我哋喺福尔摩斯

同华生现场直播！其实佢居然认为我哒得上马来仔，已经喺睇低我嘅眼光。。。。

出咗闸口，就有机场staff企响度发放免费既sim卡，游客可以随便取用。随卡有埋说明书，去7-11就可以增

值。喺喔，我哋喺清迈嘅sim卡仲有28株，使用期限喺3月中，有近期去嘅朋友可以搵我攞。同喺驴友，互助互动

互乐喺真谛。

嚟接机嘅AYA司机完全唔识英文，又唔敢确认我哋嘅乘客身份，搞到马来仔同佢企响度，大家眼琼琼，唯有不

断咁SA WA DI CUP作为热场沟通。最后个司机搵埋AYA嘅门面经理过来先解决问题。由此可见，AYA嘅服务几认

真严谨，比个赞赏。

上咗车，加油、7-11增值买水后，直接上路。在此要介绍下清迈去派嘅路况。早在出发前半年，马来仔就面

有惧色咁介绍派途。山多弯多，转完左边转右边，成车人喺里边fing 嚟fing去，活佛坐住都会呕。据闻其上次同宝

宝去派，带足三个面盘，服侍三个女仔......二个半钟嘅车程，佢哋呕足三个钟，一落车就好似水龙头咁，喷到地下

嘅花花草草全部枯萎。

我哋三个都对其描述产生怀疑。毕竟大家都去过自驾过川藏，仲有咩路核突过果边？不过既然佢讲到咁逼真，

有查咗宝宝嘅派介绍帖，睇到佢哋响派落车之后真喺面有菜色，都不得不留个心眼，做好心理准备。

事实上，派途的确绕住山盘旋而行，弯多路急。对于喺城市中行惯宽敞直路嘅驴友嚟讲，有D挑战性。而我哋一行

四人，全部安然到达，精神不减。马来仔嘅忠告喺善意嘅，提醒驴友们注意呢段路程，坐车状态一般嘅朋友，不妨

吃粒晕浪丸。

到咗派，搵到住处放低嘢都可以睇明珠930了，啦啦声出去医肚。

派只喺个县城，格局布置如棋格，由街头行到街尾都喺十零分钟，唔惊荡失路。又因地处山区，入夜之后气温

骤降，都几容易冷亲。提醒驴友喺派夜间注意保暖，感冒咗带病游玩不单止辛苦自己，浪费金钱，仲令队友担心，

无办法放开享受旅程。Michelle就喺个好例子，容后再表。

夜市基本上喺外国人，绝大部分都喺鬼佬。我一直费解呢个咁似我乡下嘅县城会吸引到咁多鬼仔呕三个钟过来

玩。当晚同马来仔有过关于呢个问题嘅对话。

马来仔：其实啲鬼仔旅游理念好简单，咩都自助自乐。派呢度可以满足佢哋嘅心理需要。可以租单车租摩托，

捺张地图喺手，天马行空，想去边就去边。而且派一啲城市痕迹都无周边全部系田园，仲喺东方嘅田园，见到边处

靓，感觉好，咪停车“坐爱”咯！贴近自然喺鬼仔嘅理念，同国人思想完全唔同嘎！似乎有啲道理，收录。

又吹水咗成段，继续。我哋行夜市，唔算热闹又不至于冷清，成条街市有D淡妆浓抹总相宜嘅感觉。小吃都几多，

两位女性行到边吃到边，呢度几条肉串，果边一碗糖不甩，几乎成条街比佢哋吃匀晒，佢哋后边跟住几十条狗，摇

尾等候佢哋吐出嘅骨头同肉屑。马来仔又开始佢嘅老本行—街拍。有个卖烧烤嘅西施俾佢由头到脚影晒，搞到人哋

唔好意思，“人面火光相映红”。

前菜嚼完，搵咗间泰餐厅吃正菜。查实间间泰餐厅都差唔多，菜式都一样，咩冬阴功，炒饭，无咩特色。记忆

尤深就喺果度嘅阴功汤，辣到我即刻贯通咗任督二脉，白雾升腾而起，足足坐化咗十分钟，饮咗四只椰子。下次勿

搞我。

吃饱饮足，按照旅游礼仪“捞汁”，四条友兜翻一圈小城，返酒店休息。值得一提嘅，就喺之前比马来仔相机

强奸嘅烧烤西施见到我哋到翻嚟，竟然相逢不相识，如同路人—超，本身就喺路人。马来仔见状，提起相机嘅手又

放低，口中嗡嗡沉沉，听唔清楚，我只喺依稀听到“宝宝...”唉，痴！

酒店介绍：我哋入住嘅喺 Baan Suan Rim Pa。大家可以喺网上查到。其实就喺家庭旅馆，主人家已集中住喺

院内新起嘅小洋房内，其他地方都改成平房式嘅房间，每四间为一栋，两间相对，适合四人比邻而住。房内设施一

般，满足基本住宿需要，配毛巾，无牙刷牙膏。不过房内隔音好差，领导喺Michelle咬耳仔讲我嘅坏话都俾我听到

一清二楚，当然，第日我哽喺诈唔知啦。新婚或者新建关系男女入住要注意啦，我唔洗讲，你知嘅。仲有，酒店装

配电热水器，1000W嘅功率，出水小，温度低，冲个凉相当有挑战性，我同马来仔平均冲凉加洗头时间喺两分半

钟......

好啦，一轮嘴讲咁多，上啲当日嘅图先。

枫林晚箫 · 2012-02-05 13:26

去派嘅路上，初上车，听到马来仔嘅路况描述，个个严阵以待。Michelle紧紧抓住前面，深呼吸。

点鬼知山路不过如此，我睇相都无问题。

放低行李行夜市。

马来仔起痰嘅烧烤西施。

唉，我食唔晒，益你啦，兄弟。留意，后边两个鬼仔好型。

呢只几好味，share下先！

就喺呢碗汤，卖相几好，超辣。

我辣到顶唔顺，出去煲烟，个场景好似重庆森林，我好似喺出边睇水嘅蛊惑仔。

喺7-11见到蓝色樽盖嘅益力多，勾起童年回忆。

呢间就喺我哋首晚住嘅家庭旅馆

枫林晚箫 · 2012-02-16 13:01

话说枫林一行四人舟车劳顿从深圳到达派，稍作果腹就上床休整。当晚，我要同马来仔一间房，一张床，咪话

都几惊下，咁大个仔，成十几年都未同麻粒佬同床异梦过，个衰仔喺床度又阴阴嘴笑望住我，鸡皮都起晒。隔离房

两个女人似乎enjoy紧旅途嘅兴奋，窃窃私语，谈兴甚浓。到咗半夜，我发现只手点解凉浸浸，朦胧中辣下眼睇

下，哇，已经贴晒地！马来仔打住鼻鼾，一个大字栏喺床上，而我被逼到侧埋一边，退无可退，无计，唯有静静饮

泣。。

好辛苦先涯到天光，一班人恢复翻D活力，大清早就起晒身四围逛。除开房间嘅花洒同隔音，呢间家庭旅馆嘅

布局都几好，虽然纵深唔够，但喺设计上主人应该花咗D心思。原本可以一条直路行到督，改成几条曲折嘅小径串

起身，小路之间种竹枝，摆埋D佛像图腾点缀，颇有小园幽径嘅意境。退房时，啱啱撞正僧侣過嚟化缘。主人家一

早就准备好俾僧人嘅嘢，一排跪低，虔诚地聆听诵经，我哋就好好奇咁睇埋成个过程。泰以佛立国，大部份国民都

信仰佛教，90%佛教徒又皈依小乘佛教，讲求自我完善与解脱，对人非常和善，无害人之心，助人为乐。我哋响

泰国遇到嘅当地人都非常热情，好鬼nice。

Check out完，去搵早餐。清晨嘅派，晨曦初露，清凉舒适。街度基本上无咩游人，得D当地人喺度食早餐。

辣咗下，同我哋早餐差唔多，粥同油条。佢哋嘅粥，捞埋姜丝葱白等香料，食落去好暖胃；油条唔同我哋呢边长长

嘅一条，整到好似海星咁，原料一样，都喺面粉俾油炸。

嚼完早餐，开始一日嘅行程：租摩托，搵酒店，游半圈派县。先前喺booking度查咗一间resort，相睇落去都

唔错，决定去实地考察下。

租车喺aya，马来仔推荐嘅，胜在车源多，可挑性强。领导打死都唔敢自己揸，我唯有顶硬上。其实D摩托全

部喺绵羊仔，只要识踩单车都晓揸，哒火拧油搞掂。去派嘅朋友大可以放心租嚟兜风，一来操控性唔难，二来喺派

度的确需要机动交通工具，若果踩单车环游，除非你喺黄金宝，否则千祈咪玩，我哋当日中午见到两个踩单车踩到

索晒气嘅两个珠海驴友，好阴功咁问我哋路程，真喺我见犹怜。。。希望果两个驴友无睇到呢篇文章。。。此为后

话。

租埋车，喺aya度攞埋几份派县线路图，三车四人杀去酒店。一路上都系田园风光，错落有致嘅村屋，纵横交

错嘅农田蕉林，空气清爽，揸住绵羊仔感受下都有D新意。可惜我只绵羊仲要多一只大肥婆，明显唔够力，我远远

落喺马来仔同michelle后面，搞到我哋尘满面，鬓如霜。

到咗resort，我哋先傻咗下，得，得两栋楼？！征得reception同意，我哋入去参观。企喺栋楼嘅休闲阳台，豁

然开朗！180度田园嘅视野，时值冬天，田野虽然无咩农作物，讲唔上郁郁葱葱，都算喺禾黄一色；resort自有嘅

农舍，养咗两只羊，悠然自得咁嚼草皮，远处嘅村落几条炊烟，缓缓散去。。。阳台两张吊床，可以栏喺上边，特

别喺午后，枕住景色或呆或睡，都喺种心理享受~~~阳台下边唔远有个圆形围座，俾人用来作篝火晚会。

领导同michelle似乎几中意，俾咗个眼色我，识做啦，啦啦声拖埋马来仔去倾房价。两条友围住个reception，

一轮嘴话cheaper cheaper，牙齿都讲断埋，个泰妹一直微笑听住，又睇到我哋舔嘴唇，好热情咁倒咗杯咖啡过

来，开始讲，我作唔到主，你哋饮杯先，我叫经理过来。倏一声无咗影。

噗！！！我同马来仔互吐对方一面水！你卤味，做唔到主早讲吖，晒咗我哋咁多口水！

正当我哋抹紧头果时，一声温柔嘅“sa wa di ca”传過嚟。因我背对住声源，净系留意到面对声源嘅马来仔反

应。条粉肠好似冻僵咗咁，眼都唔盏喺咁望住前面，目光中，有先前嘅愤懑转为平和，再转向温柔。。。我嗌咗几

声佢都无反应，成碌木咁。实在顶唔顺，大嗌一声：阿~~宝~~，佢先如梦初醒，渐趋正常。

个经理叫kay，几靓女下，眼大大，扎条马尾，着住套装高踭鞋配埋黑袜，几有office lady嘅feel，不过多左D

未经世俗浸淫太耐嘅清丽，望落都几醒神。之后嘅倾价过程简直就喺兵败如山倒，kay一声“ca”，马来仔就即刻一

声“ok”，我哋三个对望咗下，再翻开自己银包睇下，都自觉退埋一边，由佢ok啦。

都算条茂李有翻D良心，或者kay俾嘅价钱公道，房费大家都可以接受，不过马来仔心有愧意，头嘚嘚行埋過

嚟，算啦，我哋大人有大量。

我哋订埋今晚嘅BBQ，放下烟花，饮下小酒，呵呵，何以抒怀，唯有杜康。

安排妥当，开始行景点。首先喺“瀑布”。

讲到瀑布，好自然就联想到黄果树、德兴。磅礴大气，疑是银河落九天。马来仔评价话唔错，我哋三个兴冲冲

咁，开足马力扑过去！足足骑咗20分钟。

到咗景区，泊埋车，步行而上。

“马来仔，系咪要步行好远，点解无水声？”

“唔远，唔远，转个弯就到！呐，见到未，到啦！”

只见一条水喉喺山谷嘅岩石度潺潺而流，下边水潭清澈见底，几个鬼佬沿住岩石手脚并用，攀爬而上。

“喺咪仲要翻过呢座山？仲要几耐？”我转身问。

“咧，呢个咪瀑布咯！无见到D水咩？”

嘭！

可怜嘅枫林，失足跌咗落水潭。。。

“扑你街，呢个就喺你话唔错嘅瀑布？！”枫林抓住马来仔衣襟。

Michelle同领导你望我，我望你，神情肯定咗我嘅质问。

“睇下地图，呢度标明‘waterfall’啊！我又无呃你！唔错啊，山水相宜，水流唔急唔慢，几有诗意。。。”

我垂头丧气，心虽不甘，却已身在其中，无处一抒胸臆。唯有靠响水潭边洗头洗脚，口中喃喃：瀑布之水清

兮，可以濯吾缨；瀑布之水浊兮，可以濯吾足。

事后，我哋三个饮咖啡吹水果时，肯定咗马来仔。佢真喺一个好容易得到心理满足嘅人，山长水远扑去睇个水

龙头，而且仲喺第二次，佢话嘅美景所言不虚，至少对于佢嚟讲。我开篇话斋，旅途处处喺风景，只要你有呢份心

情去享受呢个过程。或者对于马来仔嚟讲，风景已经喺去瀑布途中领略晒，真正嘅景点已经唔重要，境由心生。事

后佢都话，如果同宝宝一起，边处唔系景？又系，阿宝喺度，咩都喺陪衬啦！而我哋，一心冷住见黄果树，似乎其

他水流就唔喺瀑布，带住呢种目的而去，自然失落而回。一份心情喺度，摘朵蒲公英都会拈花而笑。

当然，呢D喺时候嘅感悟，果时我真喺哭笑不得。心里边不断诅咒马来仔。终于，咒语灵验，回程时，马来仔

一个唔觉意炒车，成个脚踝俾部绵羊压住，痛到佢返深圳。唉，诅咒遮，打几个哈欠咪算啦，使唔使咁大报应！

下个景点喺中国村。据闻喺一个世纪前俾卖猪仔过嚟南洋谋生嘅华裔发展而来嘅村落，同喺华夏子孙，去睇下佢哋

喺他乡繁衍嘅概况，都值。

路过一个村社，有座佛庙，似乎啱啱开完庙会，热闹非凡，我哋自然好奇入去睇睇。里边嘅信众，个个兴高采

烈咁担担抬抬，有条不紊。见到我哋，都好友善咁打招呼，似乎我哋嘅到访，佢哋嘅信仰得到共鸣。

前行，忽闻炮仗声。

呢度兴放炮仗咩？

“到中国村了，春节梗系放炮仗啦。。。”马来仔绝尘而去。

条村无咩特别，但喺同我哋嘅内地村庄又有讲唔出嘅唔同。俾我感觉，个布局好似半坡、大汶口文化咁，圆墩

墩嘅屋仔搭D茅草做顶，餐厅里边一条长廊，摆满晒长条凳，唔觉有咩特别。今次无埋怨马来仔，因为佢都无嚟

过。

草草参观十零分钟，怏怏而回。骑出村口无耐，见到两个女驴推住单车迤逦而行。见到我哋讲紧粤语，即时同

马来仔打招呼：

“啊，啊，（气喘）呢位阿叔，个中国村仲有几远啊？”

“阿叔？姐姐仔，我好老咩？点睇我都唔似老呀！就喺质须留长咗D，皮肤黑咗D，你听我把声唔会好老喺嘛？

可能喺我戴咗头巾显老咯，其实唔喺噶，你睇下。。。哎呀。。。”

“你卤味，成个唐僧咁，你当佢哋两个喺隔离个两个妖啊？！”我一脚伸开马来仔。“唔远啦，前面100米就

到，加油！你哋边度嚟嘎？”都喺我讲嘢得体。

“珠海嘎，啊，啊（喘气），我哋足足踩咗二个半钟，先啱啱到，啊，啊（喘气）”

“犀利，点解唔租部绵羊仔啊？搞到气都索埋！”

“唔识揸啊，冷住地方唔大，一阵就到，点知望山跑死马。”

我哋带住怜香惜玉嘅眼神，目送佢哋入村。喺派租单车？除咗脚抽筋呕白浦，无第三个结局。

一路驰回县城，搵间餐厅医肚。顺便将上昼嘅相发下微博。泰国就喺好，边间餐厅咖啡馆都有wifi，仲可以上

埋喺内地上唔到嘅网。

稍作休整，已经3点几。马来仔郑重推荐去coffee in love。佢话间咖啡厅设喺半山腰，一片花丛园景，又有人

造场景，绝对喺个取景好去处。经过瀑布事件，我哋对马来仔嘅眼光已心存怀疑，亦有所犹豫。马来仔开始佢嘅强

项：吹水。一直到佢喺烈日下讲足成粒钟，牙齿都晒黑埋，我哋先勉强前往。

马来仔今次无呃我哋。呢间咖啡厅坐落位置好好，视野开阔，人造精致浪漫，坐喺度吹下山风叹杯，咖啡几唔

错。Michelle入咗大观园咁，喺花丛度飞黎飞去，马来仔发挥佢嘅专业品质，不断禁快门。我同领导买咗几张明信

片，寄俾内地嘅父母，送上遥远嘅新年祝福。

捱到近黄昏，返去玩resort。回程马来仔带错路，来到一片荒草地。配上日落西山嘅余光，将成片荒地染到黄

甘甘，一种丰收嘅感觉。

驻足，取景，流连。

Michelle引以为豪嘅个人相—千年之恋，就喺呢处诞生。而我同领导，不断摆pose造景，亦都取得满意效果。

当然，马来仔首当其功。

翻到resort，michelle兴致未减，拖住马来仔喺周边做show影相。我同领导坐喺阳台，斟壶茶，栏喺摇摇椅

度，吟看日落，二人有一句无一句咁搭讪，三份慵懒，七分温馨。

四条友懒懒闲闲坐喺客厅度，几杯香茗，人手一部苹果，吹下水，捱时间等BBQ。

夜幕下垂，气温骤冷。

篝火燃起，黑暗中一团火光，倍感温暖。

四条茂李围炉夜话。Waiter鱼贯而上，将准备好嘅肉串，酒水一应端上，盛宴开始。

其实烧烤本身味道一般，同前一晚烧烤西施整出嚟嘅烧肉差唔多。重要嘅喺，呢种氛围、果种温馨嘅感觉实在

久违。喺石屎森林里边，我哋隔几日就觥筹交错，吆喝买醉或卖醉，饮到瞥瞥呼，心里却无醉后嘅快意同满足。带

住目的去饮酒，又何能尽兴？又或平时三五知己相邀共醉，虽能推心置腹，却有一丝醉归之虑。似此等回归自然，

醉卧沙场嘅淋漓，难有一夜；又得知交相伴，如一泓清水，不带功利杂质，人生几何？

酒至半酣，腹已滚圆。四条友吹水，海阔天空，天南地北。马来仔借住酒兴，又开始讲功夫熊猫嘅古仔，向我

哋娓娓道来佢同阿宝6年几嘅风风雨雨，风雨同舟，风烛残年----唔系，风风火火。领导打咗十几个喊露，我不时撩

下火堆，michelle则若有所思，沉吟不语。条粉肠讲咗足足成粒钟，我实在顶唔住，讲声唔好意思，我去放低二两

先。点知佢话唔紧要，我哋边行边讲！！！佢居然跟住我到洗手间，甚至我嘘嘘果时企喺我后边，继续讲佢哋嘅风

风雨雨----宝宝，救我啊！！！

劈晒酒，waiter带咗两只孔明灯等我哋放飞。

童年嘅回忆翻晒嚟。果时阿公带住佢自制嘅孔明灯，带我去学校嘅操场放飞。阿公仲教落，抓住个灯许愿，放

飞佢，如果个灯一直上升直到你睇唔到，你个心愿就会达成……

Michelle同马来仔共放一只，佢哋黑埋眼，虔诚咁祈祷，只见马来仔好似念佛经咁，嗡嗡沉沉唔知呃么，净系

听到个“宝”字。Michelle就如圣女点奥运火炬咁，庄严肃穆行晒成个流程。

连平时嬉皮笑脸嘅领导，此刻都如求送子观音咁，唞氣都唔敢大声，心跳都听到。。。我默默咁许愿，轻触灯

底，燃烧嘅底座越烧越旺，映红晒领导一本正经嘅肥靥，随着waiter嘅指示，心愿随着越显渺小嘅灯光，徐徐飘向

远方嘅星空……

天日，肯定喺个艳阳天。

马来仔，你就住情节摆相跟帖啊！